កាលពីព្រឹកថ្ងៃទី២ ខែវិច្ឆិកា ឆ្នាំ២០១៨ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានដឹកនាំសមាជិក សមាជិកា មន្ត្រី បុគ្គលិកកាកបាទក្រហមកម្ពុជា ជួបសំណេះសំណាលសាកសួរសុខទុក្ខ និងផ្តល់អំណោយមនុស្សធម៌កាកបាទក្រហមកម្ពុជា ដល់ប្រជាពលរដ្ឋចាស់ជរាគ្មានទីពឹង ស្ត្រីមេម៉ាយកូនច្រើន កុមារកំព្រា ជនពិការ និងអ្នករស់នៅជាមួយមេរោគអេដស៍ចំនួន១.៦៣៦គ្រួសារ អញ្ជើញមកពីភូមិចំនួន៧១ ឃុំចំនួន១១ ស្រុកចំនួន៤ នៃខេត្តកំពង់ឆ្នាំង ។
ក្នុងការអញ្ជើញជួបសំណេះសំណាលសួរសុខទុក្ខ និងចែកអំណោយដ៏ថ្លៃថ្លានេះផងដែរ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក៏បានជួប និងបន្តឧត្ថម្ភផ្ទះថ្មមួយខ្នងទំហំ ៥ ម៉ែត្រ គុណ ៧ ម៉ែត្រ បន្ថែមទៀត ដល់ម្តាយដ៏កំសត់របស់ក្មេងស្រី២នាក់ដែលត្រូវបានឃាតកររំលោភសម្លាប់យ៉ាងសាហាវព្រៃផ្សៃ ហើយត្រូវបានពូរបស់ពួកគេរកឃើញនៅក្នុងកេស នៅលើខ្ទមរបស់ពួកគេ កាលពីវេលាម៉ោង១១និង ៣០នាទី ថ្ងៃទី១៨ ខែតុលា ឆ្នាំ២០១៨ ស្ថិតនៅភូមិថ្មី ឃុំផ្សារ ស្រុកបរិបូណ៌ ខេត្តកំពង់ឆ្នាំង ។
ជាមួយទឹកចិត្តដ៏ថ្លៃថ្លានេះ ម្តាយក្មេងស្រីរងគ្រោះឈ្មោះ អ៊ុល ធីតា អាយុ ៣៤ ឆ្នាំ បានស្រក់ទឹកភ្នែក អួលដើមករកអ្វីថ្លាថ្លែងពុំបាននោះទេ ដោយមានតែឱនលើកម្រាមដៃដប់ សំពះថ្លែងអំណរគុណដល់សម្ដេចកិត្ដិព្រឹទ្ធបណ្ឌិតប៉ុណ្ណោះ ។ ជាមួយគ្នានោះផងដែរ សម្ដេចកិត្ដិព្រឹទ្ធបណ្ឌិតក៏បានលើកទឹកម្ដាយក្មេងស្រីរងគ្រោះឲ្យរឹងមាំឡើង ខំកសាងជីវិតថ្មីជាមួយគ្រួសារ ដើម្បីបង្កើតកូនចៅបន្ដទៀត ព្រោះសម្ដេចយល់ច្បាស់ណាស់ ចំពោះទុក្ខខ្លោចផ្សានៅពេលបាត់បង់កូនជាទីពឹងបែបនេះ ។
គួររម្លឹកថា ក្រោយហេតុការណ៍បានកើតឡើងភ្លាមៗ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក៏បានចាត់ឱ្យមន្ត្រីក្រោមឱវាទ ចូលរួមរំលែកទុក្ខដ៏ក្រៀមក្រំបំផុត នៅក្នុងពិធីបុណ្យសពរបស់ក្មេងស្រីបងប្អូនបង្កើតទាំងពីរ នូវទឹកប្រាក់ចំនួន ២០ លានរៀល និងព្រមទាំងបាននាំយកគ្រឿងបរិភោគចំនួនផងដែរ ៕ ដោយ៖ ឧត្តម