អ្នកបម្រើក្នុងភោជនីដ្ឋានមួយក្នុងរដ្ឋ North Carolina (សហរដ្ឋអាមេរិច) មានអារម្មណ៍ភ្ញាក់ផ្អើល និងរំភើបយ៉ាងខ្លាំង បន្ទាប់ពីទទួលបានលុយធីបចំនួន ១០.០០០ដុល្លារពីអតិថិជនម្នាក់ ដែលហៅទឹកតែ ២កែវប៉ុណ្ណោះ។
អ្នកបម្រើដ៏មានសំណាងនោះមានឈ្មោះថា Alaina Custer។ នាងធ្វើការនៅភោជនីដ្ឋាន Sup Dogs ក្នុងទីក្រុង Greenville និងជាសិស្សមហាវិទ្យាល័យផងដែរ។ នាងមានអារម្មណ៍រំភើបយ៉ាងខ្លាំងនៅពេលឃើញលុយមួយដុំសុទ្ធតែក្រដាស ១០០ដុល្លារ នៅពេលនាងធ្វើការសម្អាតតុ។
ចំណែកអតិថិជនដ៏មានចិត្តសប្បុរសនោះគឺជាតារា Youtube ដ៏ល្បីឈ្មោះដែលមាន Channel ឈ្មោះថា MrBeast។ បច្ចុប្បន្ននេះ MrBeast មានអ្នកចុច Subscribe ជិត ១០លាននាក់ ហើយវីដេអូរបស់ MrBeast ផ្តោសំខាន់លើសកម្មភាពសប្បុរសធម៌។
ងាកមកអ្នករត់តុសំណាងនោះវិញ។ នាងនិយាយប្រាប់ការសែត The News & Observer ថា “ខ្ញុំមិនគិតថាវាជាការពិតនោះទេ។ ខ្ញុំបានលើកលុយឡើង ឃើញសុទ្ធតែក្រដាស់ ១០០ដុល្លា។ ខ្ញុំមានអារម្មណ៍ញ័រ ហើយនៅតែសួរដដែលៗថា តើវាជាការពិតទេ។ ខ្ញុំគិតថា មាននរណាម្នាក់កំពុងលេងសើចជាមួយនឹងខ្ញុំ”។
កាសែតក៏បានរាយការណ៍ទៀតដែរថា លុយចំនួនដ៏ច្រើននោះត្រូវបានអតិថិជនម្នាក់នោះទុកជាមួយនឹងសំបុត្រមួយ ហើយក្នុងសំបុត្រនោះនិយាយថា “អរគុណសម្រាប់ទឹកដ៏ឆ្ងាញ់”។
ក្រោយមក តារា Youtube នោះក៏បានត្រឡប់មកកាន់ភោជនីដ្ឋាននោះវិញសើម្បីជួបជាមួយនឹងអ្នកដែលគាត់ផ្តល់សំណាងឲ្យ។
បន្ទាប់ពីមានសំណាងទទួលបានលុយ ១០.០០០ដុល្លា អ្នកបំរើនោះបានធ្វើរឿងដែលគួរឲ្យសរសើរមួយផងដែរ ដោយនាងមិនយកលុយធីបនោះទាំងអស់ទេ។ នាងបានយកវាតែចំនួន ៨០០ដុល្លារប៉ុណ្ណោះ ហើយសល់ប៉ុន្មាន ទុកឲ្យបុគ្គលិកធ្វើការជាមួយនាងចែកគ្នា ហើយក្នុងបុគ្គលិក ម្នាក់ៗទទួលបាន ២០០-៣០០ដុល្លារដែរ៕ សុភ័ក្ត្រ
ប្រភព៖ news.com.au & huffingtonpost
