ប៉ៃលិន ៖ កម្លាំងនគរបាលឃាត់ខ្លួនជនជាតិចិនម្នាក់ពាក់ព័ន្ធករណីហិង្សាដោយចេតនា កាលពីវេលាម៉ោង១និង៤០នាទី រំលងអធ្រាត្រឈានចូលថ្ងៃអាទិត្យ ទី៤ ខែវិច្ឆិកា ឆ្នាំ២០១៨ នៅភូមិផ្សារព្រំ ឃុំស្ទឹងកាច់កាច់ ស្រុកសាលាក្រៅ ខេត្តប៉ៃលិន។
មន្ត្រីនគរបាលខេត្តប៉ៃលិន បានឲ្យដឹងថា ជនបង្កឈ្មោះ លាង វូ (liang wu) ភេទប្រុស អាយុ២៣ឆ្នាំ ជនជាតិចិន ស្នាក់នៅក្នុងកាស៊ីណូក្រោន។ ជនរងគ្រោះមានឈ្មោះ ញាញ ស្រីដា ភេទស្រី អាយុ ១៨ឆ្នាំ មុខរបរមប្រើការនៅខារ៉ាអូខេ”សិន” ( SENSE ) មានទីលំនៅក្នុងភូមិឃុំកើតហេតុខាងលើ។
មន្ត្រីនគរបាលដដែលបន្តថា មូលហេតុបង្កឡើងដោយសារច្រឡំមនុស្ស ព្រោះមុនពេលកើតហេតុជនជាតិចិនរូបនេះ បានឲ្យប្រាក់ទៅនារីបម្រើការនៅខេរ៉ាអូខេម្នាក់ ចំនួន១០០ដុល្លារ ដើម្បីយកនារីនោះទៅដេក ក្រោយនារីនោះបានលុយរួច នាងក៏គេចបាត់បន្ទាប់មកជនជាតិចិននោះ បានឃើញជនរងគ្រោះ ដោយស្មានថាជានារីដែលយកលុយខ្លួន ក៏ប្រើហិង្សាតែម្តង។ បច្ចុប្បន្នជនបង្កត្រូវនាំខ្លួនទៅអធិការដ្ឋាននគរបាលស្រុកសាលាក្រៅ ដើម្បីរង់ចាំធ្វើការដោះស្រាយ៕ ដោយ ៖ បញ្ញាស័ក្តិ