ពោធិ៍សាត់ ៖ បុរសម្នាក់ បានលួចធ្វើសកម្មភាពឆក់ត្រី តែដោយមិនបានប្រយ័ត្ន ត្រូវចរន្តអាគុយរបស់ខ្លួនឆក់ស្លាប់ ហើយត្រូវបានប្រជាពលរដ្ឋប្រទះឃើញដេកស្លាប់ នៅចំណុចមាត់ប្រឡាយធំ ស្ថិតក្នុងភូមិមាន់ចែ សង្កាត់ព្រៃញី ក្រុង.ខេត្តពោធិ៍សាត់ កាលពីវេលាម៉ោង៩និង៤០នាទីព្រឹក ថ្ងៃទី៣ ខែវិច្ឆិកា ឆ្នាំ២០១៨ ។
ប្រជាកសិករម្នាក់បានឲ្យដឹងថា នៅវេលាព្រឹកថ្ងៃទី៣ ខែវិច្ឆិកា គាត់បានមកមើលទឹកស្រែដើរតាមខ្នងប្រឡាយ ក៏ប្រទះឃើញសាកសពបុរសម្នាក់ដេកស្លាប់នៅមាត់ប្រឡាយ ដោយមានស្ពាយអាគុយ និងឧបករណ៍សម្រាប់ឆក់ត្រី ឃើញដូចនេះគាត់ក៏បានផ្តល់ព័ត៌មានជូនសមត្ថកិច្ចនគរបាល និងអាជ្ញាធរមូលដ្ឋាន មកធ្វើការត្រួតពិនិត្យ និងស្វែងរកសាច់ញាតិរបស់ជនរងគ្រោះ ។
លោកអនុសេនីយ៍ឯក ហ៊ិន សុខេង អធិការរងទទួលបន្ទុកការងារនគរបាលយុត្តិធម៌ នៃអធិការដ្ឋាននគរបាលក្រុងពោធិ៍សាត់ បានអះអាងថា ក្រោយពីសមត្ថកិច្ចអាជ្ញាធរមូលដ្ឋាន បានពិនិត្យ ទៅលើសាកសពជនរងគ្រោះ បានកំណត់វេលានៃការស្លាប់របស់ជនរងគ្រោះស្លាប់នៅវេលាម៉ោង៣យប់ថ្ងៃដដែល សាកសពជនរងគ្រោះត្រូវបានសមត្ថកិច្ចស្គាល់អត្តសញ្ញាណឈ្មោះ តឺក ខឿន ហៅកិះ ភេទប្រុស អាយុ៥៦ឆ្នាំ រស់នៅភូមិព្រៃឱម៉ាល់ សង្កាត់រលាប ក្រុងខេត្តពោធិ៍សាត់ ។
ក្រោយពីធ្វើការពិនិត្យយ៉ាងយកចិត្តទុកដាក់ ពីសមត្ថកិច្ច និងអាជ្ញាធរ បានសន្និដ្ឋានថា បុរសរូបនោះ ពិតជាស្លាប់ដោយឆ្លងចរន្តអាគុយ ឆក់ស្លាប់ពិតមែន ហើយបានប្រគល់ សាកសពជនរងគ្រោះ ជូនក្រុមគ្រួសារធ្វើបុណ្យតាមប្រពៃណី៕ ដោយ ៖ បញ្ញាស័ក្តិ