ភ្នំពេញ ៖ ក្រសួងព័ត៌មាន បានប្រកាសថាសម្ដេចតេជោ ហ៊ុន សែន បានកំណត់យកថ្ងៃទី២១ ខែមករា ឆ្នាំ២០១៨ ដើម្បីជួបសំណេះសំណាលជាមួយអ្នកសារព័ត៌មានទូទាំងប្រទេសជាលើកទី២ ។
បើយោងតាមសេចក្ដីជូនដំណឹង របស់ក្រសួងព័ត៌មាន នៅថ្ងៃទី៨ ខែធ្នូ ឆ្នាំ២០១៧ ស្តីពីការចុះឈ្មោះចូលរួមពិធីជួបជុំរវាងសម្តេចតេជោនាយករដ្ឋមន្ត្រីនៃព្រះរាជាណាចក្រកម្ពុជា និងអ្នកសារព័ត៌មានក្នុងស្រុកលើកទី២ ថ្ងៃទី២១ ខែមករា ឆ្នាំ២០១ នៅមជ្ឈមណ្ឌលសន្និបាត និងពិព័រណ៍កោះពេជ្រ។
អគ្គនាយកដ្ឋានព័ត៌មាន និងសោទស្សន៍ នៃក្រសួងព័ត៌មាន បានជូនដំណឹងដល់ម្ចាស់ស្ថានីយវិទ្យុ ទូរទស្សន៍ ទស្សនាវដ្តី កាសែត គេហទំព័រ សមាគម និងក្លិបអ្នកកាសែតទាំងអស់ថា អ្នកសារព័ត៌មានដែលចូលពិធីនេះ តម្រូវឲ្យមានការចុះឈ្មោះ អគ្គនាយកដ្ឋានព័ត៌មាននិងសោតទស្សន៍ ដើម្បីទទួលបានប័ណ្ណចូលរួម ។ ដូច្នេះម្ចាស់ស្ថានីយវិទ្យុ ទូរទស្សន៍ ទស្សនាវដ្តី កាសែត គេហទំព័រ សមាគម និងក្លិបអ្នកកាសែតទាំងអស់ ដែលមានបំណងចូលរួមពិធីនេះ សូមមេត្តាទំនាក់ទំនងចុះឈ្មោះចូលរួមយ៉ាងយូរត្រឹមថ្ងៃទី២៥ ខែធ្នូ ឆ្នាំ២០១៧ តាមរយៈលេខទូរស័ព្ទដូចខាងក្រោម៖
ទី១៖ សម្រាប់ទស្សនាវដ្ដី កាសែត សមាគមន៍ និងក្លឹបអ្នកកាសែត សូមទាក់ទងលោក យ៉ែម ណយ ០១២ ៩២៦ ០១១
ទី២៖ សម្រាប់ស្ថានីយ៍វិទ្យុ និងទូរទស្សន៍ សូមទាក់ទង លោក សាន ពុទ្ធារី ០១២ ២៩២ ៩៤៩, លោក អ៊ុន បញ្ញា ០៧៧ ៩១៩ ៤៩១
ទី៣៖ សម្រាប់គេហទំព័រ និង Freelance សូមទាក់ទងលោក សូ ស៊ីដាត ០១០ ៥០៧ ៥៥១។
ក្រសួងព័ត៌មានក៏បានបញ្ជាក់ថា ម្ចាស់ឬចាងហ្វាងគ្រប់អង្គភាពដែលមានបំណងចូលរួមពិធីនេះ ត្រូវទំនាក់ទំនងផ្ទាល់ដើម្បីចុះឈ្មោះ និងភ្ជាប់ជាមួយនូវអាជ្ញាប័ណ្ណធ្វើអាជីវកម្មដែលមានសុពលភាព។
គួរបញ្ជាក់ថា ការជួបជុំគ្នារវាងសម្តេចតេជោនាយករដ្ឋមន្ដ្រី និងអ្នកសារព័ត៌មានក្នុងស្រុក បានធ្វើឡើងកាលពីថ្ងៃទី១៤ ខែមករា ឆ្នាំ២០១៧ ហើយជំនួបនេះសម្ដេចតេជោ ហ៊ុន សែន បានប្រកាសថា នឹងជួបជាមួយអ្នកសារព័ត៌មានរៀងរាល់មួយឆ្នាំម្ដង។
ជាពិធីជួបជុំទទួលទានអាហារពេលល្ងាចលើកដំបូង កាលពីល្ងាចថ្ងៃសៅរ៍ ថ្ងៃទី១៤ ខែមករានោះ ជាមួយនឹងអ្នកសារព័ត៌មានក្នុងស្រុក និងមន្ត្រីអ្នកនាំពាក្យស្ថាប័នរដ្ឋទូទាំងប្រទេសប្រមាណ១០០០នាក់ដើម្បីបង្ហាញពីចំណាប់អារម្មណ៍របស់ខ្លួនទៅលើវិស័យសារព័ត៌មាននៅកម្ពុជាលោកនាយករដ្ឋមន្ត្រី ក៏បានប្រកាសកំណត់យកថ្ងៃទី១៤ ខែមករា ជារៀងរាល់ឆ្នាំ ដើម្បីបន្តការជួបជុំអ្នកសារព័ត៌មានក្នុងស្រុកនៅថ្ងៃខាងមុខៗទៀត ប៉ុន្តែឆ្នាំទី២នេះត្រូវបានកំណត់យកថ្ងៃទី២១មករាវិញ។ សម្តេចនាយករដ្ឋមន្ត្រី ហ៊ុន សែន បានស្នើឲ្យស្ថាប័នសារព័ត៌មានទាំងអស់ក្នុងកម្ពុជា ផ្សព្វផ្សាយព័ត៌មានពិត ចៀសវាងទង្វើដែលប្រាសចាកវិជ្ជាជីវៈនិងការអត្ថាធិប្បាយក្នុងនាមជាអ្នកការពារក្តីឬចៅក្រមកាត់ក្តីដែលជះឥទ្ធិពលទៅដល់ស្ថាប័នតុលាការ។ ចំណែកស្ថាប័នរដ្ឋទាំងអស់ ត្រូវចាត់តាំងអ្នកនាំពាក្យឲ្យបានត្រឹមត្រូវនិងធ្វើបច្ចុប្បន្នភាពព័ត៌មានលើប្រព័ន្ធអនឡាញ ឲ្យបានឆាប់រហ័ស ដើម្បីផ្តល់ព័ត៌មានឲ្យបានគ្រប់ជ្រុងជ្រោយទៅដល់អ្នកសារព័ត៌មាន។ សម្តេចនាយករដ្ឋមន្ត្រី ក៏បានណែនាំឲ្យអ្នកសារព័ត៌មានផ្សព្វផ្សាយព័ត៌មានពិត និងត្រឹមត្រូវ ដើម្បីរួមចំណែកជួយសង្គម ចៀសវាងការដោះដូរព័ត៌មាន នឹងលុយ បង្កើតឲ្យមានអំពើពុករលួយក្នុងសង្គម។
សម្តេចបានបញ្ជាក់ថា បើយើងមានហេតុផល មូលដ្ឋានត្រឹមត្រូវ កុំខ្លាចគេប្តឹង សុំកុំធ្វើការដោះដូរប្រយោជន៍លុយកាក់ នឹងការបំបិទព័ត៌មាន រឿងនេះខ្ញុំឮយូរហើយ ហើយនេះជាការពិត មានអ្នកមានប្រាក់ខ្លះ ធ្វើខុស ហើយត្រូវអ្នកសារព័ត៌មានចាប់បាន ក៏ដោះដូរលុយ ដើម្បីបិទព័ត៌មាន សារព័ត៌មានបែបនេះ មិនបានដោះស្រាយបញ្ហាទេ តែបង្កើតអំពើពុករលួយទៅវិញ៕ ដោយ៖កូឡាប
