ចង់ឱ្យរោមភ្នែកឆាប់លូតវែងមិនពិបាកឡើយ។ គួរធ្វើបែបណាទៅ? កុំបារម្ភ! ខាងក្រោមនេះជាអាហារសំខាន់ៗមួយចំនួន ដែលអ្នកគួរទទួលទានដើម្បីការលូតលាស់រោមភ្នែក ៖
១. ស៊ុត
ជាប្រភពដ៏ប្រសើរបំផុតមួយនៃប្រូតេអ៊ីនដែលចាំបាច់សម្រាប់សក់និងរោមភ្នែក។ ការរួមបញ្ចូលស៊ុតក្នុងរបបអាហារប្រចាំថ្ងៃនឹងធ្វើឱ្យរោមភ្នែកកាន់តែរឹងមាំនិងវែងជាងមុន។
២. ត្រីសម្បូរខ្លាញ់
នេះក៏ព្រោះតែត្រីសម្បូរខ្លាញ់មានផ្ទុកសម្បូរទៅដោយអាស៊ីតខ្លាញ់អូមេហ្កា ៣ វីតាមីន D និងវីតាមីន B ដែលជួយជំរុញការលូតលាស់នៃរោមភ្នែក ព្រមទាំងទប់ស្កាត់ការជ្រុះ។
៣. គ្រាប់ធញ្ញជាតិ
ក៏ជាប្រភពដ៏ប្រសើរបំផុតមួយនៃអាស៊ីតខ្លាញ់អូមេហ្កា និងវីតាមីន E ដែលជួយបញ្ជូនឈាមនិងអុកស៊ីហ្ស៊ែនគ្រប់គ្រាន់ទៅកាន់ឬសនៃរោម។ ជាលទ្ធផលរោមភ្នែករបស់អ្នកនឹងមានសភាពរឹងមាំឆាប់លូតវែងថែមទៀត។
៤. ផ្លែឈើនិងបន្លែបៃតង
ជាប្រភពដ៏ល្អនៃវីតាមីន A និងវីតាមីន C ដែលមានប្រយោជន៍ណាស់សម្រាប់ការលូតលាស់រោមភ្នែក និងការផលិតកូឡាជែន។
៥. ផ្សិត
មានផ្ទុកសម្បូរទៅដោយវីតាមីន B3 ដែលជួយសម្រួលចរន្តឈាមនិងការផលិតសារធាតុ keratin ល្អសម្រាប់ការលូតលាស់នៃរោមភ្នែក ព្រមទាំងទប់ស្កាត់ភាពស្ងួតនិងផុយស្រួយឆាប់ជ្រុះទៀតផង។
៦. សណ្ដែក
ជាប្រភពដ៏ប្រសើរនៃវីតាមីន H និងអាស៊ីតហ្វូលិកដែលជួយបង្កើនលំហូរឈាមទៅកាន់ឬសនៃសក់ ឬរោម។ ជាលទ្ធផលរោមភ្នែកអ្នកនឹងមើលទៅក្រាស់ជាងមុន ហើយចៀសផុតហានិភ័យនៃភាពស្ងួតងាយជ្រុះ។ ការរួមបញ្ចូលសណ្ដែកក្នុងរបបអាហារក៏ជួយឱ្យរាងកាយ អាចស្រូបបាននូវអាស៊ីតអាមីណូ និងជាតិខ្លាញ់ ដែលចាំបាច់សម្រាប់សុខភាពរោមភ្នែកល្អរឹងមាំផងដែរ៕
អត្ថបទ៖ health.com.kh
