បក្សកានអំណាចជប៉ុន នឹងធ្វើការជ្រើសរើសអ្នកស្នងតំណែងថ្មីនៅថ្ងៃទី ១៥ ខែកញ្ញា ក្រោយពេលលោកនាយករដ្ឋមន្ត្រី Shinzo Abe បានប្រកាសលាលែងតំណែង កាលពីថ្ងៃសុក្រម្សិលមិញ ដោយសារបញ្ហាសុខភាព។ នេះបើតាមការចុះផ្សាយរបស់ទីភ្នាក់ងារសារព័ត៌មានជប៉ុន Kyodo។
ប្រធានបក្សប្រជាធិបតេយ្យសេរីរបស់លោក Shinzo Abe ត្រូវបានគេអះអាងថា នឹងក្លាយទៅជានាយករដ្ឋមន្ត្រី ដោយសារតែបក្សនេះមានអសនៈភាគច្រើន នៅក្នុងសភាជាន់ទាប់។
លោក Shinzo Abe គឺជានាយករដ្ឋមន្ត្រីដែលកាន់តំណែង បានយូរបំផុតក្នុងប្រទេសជប៉ុន ប៉ុន្តែកាលពីថ្ងៃម្សិលមិញ គាត់បានប្រកាសចុះចេញ ដោយលើកហេតុផលថា គាត់មិនចង់ឲ្យបញ្ហាសុខភាពគាត់ប៉ះពាល់ដល់រដ្ឋាភិបាល។
នៅក្នុងសន្និសិទសារព័ត៌មាន លោកបានបដិសេធបញ្ចេញឈ្មោះអ្នកស្នងតំណែងថ្មី។
អតីតរដ្ឋមន្ត្រីការពារជាតិ Shigeru Ishiba និងអតីតរដ្ឋមន្ត្រីការបរទេស Fumio Kishida បញ្ជាក់ថាពួកគេមានបំណងចូលរួមការប្រកួតប្រជែងនោះ ខណៈដែលរដ្ឋមន្ត្រីការពារជាតិ Taro Konoក៏ត្រូវបានគេចាត់ទុកថា ស្ថិតក្នុងចំណោមបេក្ខភាពដែលមានសក្តានុពលផងដែរ។
ឧបនាយករដ្ឋមន្ត្រី Taro Aso ដែលលោកជាអតីតនាយករដ្ឋមន្ត្រី និយាយថា លោកគ្មានគម្រោងចូលរួមក្នុងការប្រកួតប្រជែងនោះឡើយ។
ជាធម្មតានៅជប៉ុន បក្សកាន់អំណាចត្រូវធ្វើការប្រកាសពីការបោះឆ្នោតជ្រើសរើស មេដឹកនាំឲ្យបានមុន ១ខែ ប៉ុន្តែក្នុងករណីមានការលាលែងភ្លាម ការបោះឆ្នោតវិសាមញ្ញានឹងត្រូវធ្វើឡើង ក្នុងពេលវេណាឆាប់ៗមួយ ដែលអាចធ្វើបាន៕
ប្រែសម្រួល៖ សុភ័ក្រ
ប្រភព៖ Reuters
