ភ្នំពេញ ៖ រថយន្តTAKOMAមួយគ្រឿង បើកបក្នុងល្បឿនលឿនទាំងបំពានស្តុបទៅបុករថយន្តម៉ាកព្រូស ចំពាក់កណ្តាលពេញទំហឹងបណ្តាលឲ្យប៉ើងទៅប៉ះម៉ូតូ២គ្រឿងទៀត រងការខូចខាត ចំណែករថយន្តបង្កបើករត់គេចខ្លួនបាត់ស្រមោល។
ហេតុការណ៍គ្រោះថ្នាក់នេះដែរបានកើតឡើងកាលពីវេលាម៉ោង១១ និង៣០នាទីយប់ថ្ងៃអង្គារ៍ទី១៦ ខែកុម្ភៈ ឆ្នាំ ២០២១ ស្ថិតនៅតាមបណ្តោយផ្លូវកម្ពុជាក្រោម កែងផ្លូវ២៦១ សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ។
បើយោងតាមប្រភពព័ត៌មានពីជនរងគ្រោះបានរៀបរាប់ឲ្យដឹងថា មុនពេលកើតហេតុគាត់បានបើករថយន្តមួយគ្រឿងម៉ាកព្រូស ពណ៌ទឹកប្រាក់ពាក់ផ្លាកលេខភ្នំពេញ 2AX 2508 ចេញទៅហូបអីតិចតួចជួបជុំមិត្តភក្តិ រួចក៏បើករថយន្តចេញទៅវិញគោលបំណងត្រឡប់ទៅផ្ទះ ធ្វើដំណើរតាមបណ្តោយផ្លូវ២៦១ ក្នុងទិសដៅពីត្បូងមកជើង ពេលមកដល់ចំណុចកើតហេតុ ស្រាប់តែគាត់ឃើញរថយន្តម៉ាកTAKOMA ដែលមិនចាំផ្លាកលេខ ធ្វើដំណើរតាមបណ្តោយផ្លូវកម្ពុជាក្រោម ក្នុងទិសដៅពីកើតមកលិចក្នុងល្បឿនលឿន មកបុករថយន្តគាត់ចំពាក់កណ្តាលទ្វារពេញទំហឹង បណ្តាលឲ្យប៉ើងទៅបុកម៉ូតូ២គ្រឿងទៀត នៅលើខឿនផ្លូវរងការខូចខាតទាំងម៉ូតូនិងរថយន្តយ៉ាងដំណំ ចំណែករថយន្តបង្កបើករត់គេចខ្លួនបាត់ស្រមោល។
ក្រោយពេលកើតហេតុសមត្ថកិច្ចមូលដ្ឋាន សហការជាមួយនឹងចរាចរណ៍ជំនាញចុះមកដល់ធ្វើការវាស់វែងរួច ឱ្យជនរងគ្រោះទៅប៉ុស្តិ៍នគបាលរដ្ឋបាលទឹកល្អក់ទី១ ដើម្បីដាក់ពាក្យបណ្ដឹងរួចសមត្ថកិច្ច នឹងធ្វើការស្រាវជ្រាវតាមក្រោយ ដើម្បីឃាត់រថយន្ដបង្កខាងលើ មកដោះស្រាយទៅតាមនីតិវិធីផ្លូវច្បាប់៕ រក្សាសិទ្ធិដោយ៖ សាមេត