ភ្នំពេញ ៖ នារីរូបស្រស់២នាក់បានបើករថយន្តម៉ាកព្រូសមួយគ្រឿង ក្នុងល្បឿនលឿនខ្វះការប្រុងប្រយ័ត្នបានរេចង្កូតទៅបុកផ្ទប់នឹងជញ្ជាំងផ្ទះប្រជាពលរដ្ឋពេញទំហឹង បណ្តាលឲ្យរងការខូចខាតយ៉ាងដំណំ សំណាងល្អមិនមានគ្រោះថ្នាក់ទៅដល់មនុស្ស។
ហេតុការណ៍គ្រោះថ្នាក់ចរាចរណ៍នេះដែរ បានកើតឡើងនៅវេលាម៉ោង ៧ និង ២០ នាទីយប់ថ្ងៃព្រហស្បតិ៍ទី ១៨ខែកុម្ភៈឆ្នាំ ២០២១ ស្ថិតនៅតាមបណ្ដោយផ្លូវ ២៧៣ ក្នុងសង្កាត់ទួលសង្កែទី ១ ខណ្ឌឫស្សីកែវ រាជធានីភ្នំពេញ។
ប្រភពព័ត៌មានពីម្ចាស់ផ្ទះបានរៀបរាប់ឲ្យដឹងថា មុនពេលកើតហេតុគាត់បានឃើញរថយន្តម៉ាកព្រូសមួយគ្រឿង ពណ៌សពាក់ផ្លាកលេខភ្នំពេញ 2-BJ 4821 បើកបដោយនារី២នាក់ធ្វើដំណើរតាមបណ្តោយផ្លូវ២៧៣ ក្នុងទិសដៅពីកើតមកលិចក្នុងល្បឿនលឿនមិនប្រយ័ត្នជ្រុលទៅបុកផ្ទប់នឹងជញ្ជាំងផ្ទះបណ្តាលឲ្យរងការខូចខាតជញ្ជាំងផ្ទះមួយចំនួន។ រួចម្ចាស់ផ្ទះក៏បានរត់ទៅឃាត់នារីជានាក់បង្កដែរ តែមិនព្រមឈប់ក៏រត់ឡើងលើកង់បីជិះគេចខ្លួនបាត់ស្រមោល បន្សល់ទុកតែរថយន្តនៅកន្លែងកើតហេតុ។
ក្រោយពេលកើតហេតុសមត្ថកិច្ចមូលដ្ឋាន ចុះមកដល់កន្លែងកើតហេតុរួចបានរាយការណ៍ ទៅខាងជំនាញចរាចរណ៍ក្រុង ឲ្យចុះមកវាស់វែងនិងធ្វើកំណត់ហេតុយករថយន្តស្ទូច មកស្ទូចយករថយន្តបង្កខាងលើ ទៅរក្សាទុកនៅការិយាល័យចរាចរណ៍ផ្លូវគោក រង់ចាំដោះស្រាយនៅពេលក្រោយ៕ រក្សាសិទ្ធិដោយ៖សា មេត
