ជាការពិតណាស់ អាវកៅស៊ូពាក់ហាត់ប្រាណ គឺតែងត្រូវបានសង្កេតឃើញមនុស្សមួយចំនួន កំពុងព្យាយាមពាក់ហាត់ប្រាណ ព្រោះតែចង់ឲ្យបើកញើសស្រកទម្ងន់ តាមការផ្សព្វផ្សាយរបស់អ្នកលក់ ដែលអ្នកខ្លះសូម្បីធ្វើឡើងទាំងមេឃក្តៅហែងក៏មានដែរ។ តែទោះយ៉ាងណា ការពាក់អាវកៅស៊ូបែបនេះគឺជាការខុសឆ្គងទៅវិញ ខណៈដែលថ្មីៗនេះ មានបុរសម្នាក់បានចេញមកលាតត្រដាងគួរឲ្យភ្ញាក់ផ្អើល ពីគុណវិបត្តិរបស់អាវកៅស៊ូដ៏ក្តៅហប់នេះ ដែលមិនគួរនាំគ្នាព្យាយាមពាក់ទៀតឡើយ។
នេះបើតាមគណនីហ្វេសប៊ុកឈ្មោះ Henry Navuddh បានធ្វើការពន្យល់ឲ្យដឹងបែបនេះថា៖ «តាមពិតអត់ទេ ញេីសជាសារធាតុទឹកពីរាងកាយ ពេលអ្នកបែកញើសអ្នកនឹងបាត់ជាតិទឹកពីក្នុងខ្លួន និងសារធាតុអេឡិកត្រូឡៃត៍មួយចំនួនដូចជា អំបិល ប៉ូតាស្យូម ម៉ាញ៉េស្យូម និងកាល់ស្យូម។
បងប្អូនអាចប្រឈមនឹងបញ្ហាខ្វះជាតិទឹកនិងបាត់បង់ជាតិអេឡិកត្រូឡៃត៍ ទៅវិញ។ ចំណែកឯខ្លាញ់មិនបានបាត់បង់មកតាមញេីសទេ។
អ្នកខ្លះពាក់រត់ពេលថ្ងៃត្រង់ អាចប្រឈមនឹងការសន្លប់អោយសារក្តៅខ្លាំង (heat stroke)…
ប្រការដែលត្រឹមត្រូវ
ស្លៀកសំលៀកបំពាក់ស្តេីង ឬវាលក្លៀក ឬងាយស្រួលសម្រាប់បត់បែន
ហាត់ប្រាណក្នុងទីម្លប់ ឬកន្លែងត្រជាក់ មានខ្យល់អាកាសចេញចូល
ប្រការនេះ នឹងធ្វេីអោយរាងកាយអាចដុតបំផ្លាញកាឡូរីឬជាតិខ្លាញ់បានល្អប្រសើរជាង។
ម្ចាស់គណនីខាងលើ ក៏បានបញ្ជាក់ឲ្យដឹងផងដែរថា បុរសម្នាក់វ័យ31ឆ្នាំស្លៀកសំលៀកបំពាក់កៅស៊ូនេះរត់រយៈពេល1សប្ដាហ៍។ នៅថ្ងៃចុងក្រោយគឺគាត់ទន់អវយវៈទាំងបួន ល្ហិតល្ហៃអស់កម្លាំង រវេីរវាយ រហូតបញ្ជូនមកមន្ទីរពេទ្យ។ គ្រូពេទ្យរកឃេីញថាគាត់បាត់បង់អេឡិកត្រូឡៃត៍ច្រេីន Na+: 112 mEq/L, K+: 1.8 mmol/L.»។
ក្រោយពីបានឃើញបែបនេះ អ្នកប្រើប្រាស់បណ្តាញសង្គមជាច្រើន ក៏បានបញ្ចេញមតិលេងសើច និយាយត្រង់ៗថា៖ «អ្នកលក់អនឡាញឃើញ ផុសជេរឥឡូវហើយបង ស្រួលមិនស្រួលគម្រាមប្តឹងអោយលុបផុសហ្នឹងទៀត, អាវគេយកចូល 2$ លក់មួយ 25$ ណាបង បែកឆ្នាំងបាយគេអស់ហើយបង!…»៕ រក្សាសិទ្ធិដោយ៖ លឹម ហុង
