ទីក្រុងសេអ៊ូលនិងប៉េកាំងបានព្រមព្រៀងគ្នាដើម្បីស្ថារទំនាក់ទំនងរវាងប្រទេសទាំងឲ្យដើរមកលើផ្លូវវិញ បន្ទាប់ពីមានភាពល្អក់កករនឹងគ្នាអស់ជាងមួយឆ្នាំ ដោយសារតែការតំឡើងប្រព័ន្ធការមីស៊ីល (THAAD) របស់អាមេរិចនៅក្នុងកូរ៉េខាងត្បូង ហើយប្រព័ន្ធនេះធ្វើឲ្យប៉ះពាល់ផលប្រយោជន៍ ពាណិជ្ជកម្មរបស់កូរ៉េខាងត្បូងនៅក្នុងប្រទេសចិន។
ការតំឡើងប្រព័ន្ធការពារមីស៊ីលនៅកូរ៉េខាងត្បូង បានធ្វើឲ្យចិនខឹងសម្បារយ៉ាងខ្លាំង ដោយមហាអំណាចអាស៊ីមួយនេះជឿជាក់ថា ប្រព័ន្ធរ៉ាដារបស់ THAAD អាចនឹងត្រូវបានគេប្រើប្រាស់ដើម្បីមើលឃើញក្នុងទឹកដីចិន។
ប៉ុន្តែកូរ៉េខាងត្បូង និងអាមេរិចបាននិយាយជាច្រើនលើកច្រើនសារថា ប្រព័ន្ធ THAAD គឺប្រើសំរាប់តែការពារប្រឆាំងនឹងការគំរាមកំហែងរបស់មីស៊ីលពីកូរ៉េខាងជើងប៉ុណ្ណោះ។
នៅក្នុងសេចក្តីប្រកាសរបស់ក្រសួងការបរទេសកូរ៉េខាងត្បូងបានឲ្យដឹងថា “ភាគីទាំងពីរបានផ្តោះផ្តូរទស្សនៈគ្នាដើម្បីពង្រឹងកិច្ចសហប្រតិបត្តិការរវាងកូរ៉េខាងត្បូង និងចិន ដើម្បីបម្រើផលប្រយោជន៍ និងព្រមព្រៀងគ្នាក្នុងការនាំយកកិច្ចសហប្រតិបត្តិការ និងការផ្លាស់ប្តូរគ្រប់វិស័យត្រឡប់មកកាន់ផ្លូវអភិវឌ្ឍន៍ដូចដើម”។
បើតាមមន្ត្រីរបស់វិមានប្រធាធិបតី (វិមាន Blue House) បានឲ្យដឹងថា ប្រធានាធិបតីកូរ៉េខាងត្បូង ម៉ូន ជេអ៊ីន (Moon Jae-in) ធ្វើកិច្ចប្រជុំកំពូលជាមួយនឹងប្រធានាធិបតីចិន ស៊ី ជីនភីង (Xi Jingping) នៅក្រៅកិច្ចប្រជុំកំពូលអាស៊ីប៉ាស៊ីភិច ដែលនឹងធ្វើឡើងនៅប្រតេសវៀតណាម ជិតពាក់កណ្តាលខែក្រោយ។
នៅក្នុងលិខិតសម្របសម្រួលវិញដែរ ក្រសួងការបរទេសចិនបាននិយាយថា ប្រទេសទាំងពីរបានព្រមព្រៀងគ្នាក្នុងការស្តារទំនាក់ទំនងរវាងប្រទេសទាំងពីរឲ្យត្រឡប់មកលើផ្លូវធម្មតាដូចដើមវិញ។
ក្រសួងការបរទេសចិននិយាយទៀតថា ប្រទេសកូរ៉េខាងត្បូងបានទទួលស្គាល់បញ្ហាកង្វល់របស់ចិន ជុំវិញប្រព័ន្ធការពារ THAAD ហើយកូរ៉េខាងត្បូងបានបញ្ជាក់ឲ្យចិនយ៉ាងច្បាស់ថា ការតំឡើងប្រព័ន្ធការមិនមានគោលបំណងសំដៅដល់ប្រទេសទី ៣នោះទេ ហើយមិនគំរាមកំហែងដល់ផលប្រយោជន៍សន្តិសុខយុទ្ធសាស្ត្ររបស់ចិនទេ៕ ដោយ ៖ សុភ័ក្ត្រ
