បុរសម្នាក់បានស្លៀកពាក់ឲ្យដូចស្ត្រី អស់រយៈពេល ២០ឆ្នាំ ដើម្បីធ្វើឲ្យម្តាយគាត់ដែលមានជម្ងឺប្រសៃប្រសាទសប្បាយចិត្ត។ ម្តាយវ័យចំណាស់របស់បុរសនោះ ចាប់ផ្តើមមានបញ្ហាខួរក្បាល ដោយសារតែការស្លាប់របស់កូនស្រីគាត់។
វីដេអូរបស់បុរស ដែលមិនត្រូវបានគេស្គាល់ឈ្មោះ ដោយស្លៀកពាក់ជាបងស្រីរបស់ខ្លួន ត្រូវបានគេទស្សនៈចំនួនជាង៤លានដង នៅក្នុងបណ្តាញទំនាក់ទំនងសង្គមរបស់ចិនឈ្មោះ Weibo និងត្រូវបានយកចុះផ្សាយរបស់ប្រព័ន្ឋផ្សព្វផ្សាយចិនជាច្រើន។
បុរសដែលទំនងស្ថិតក្នុងវ័យ ៥០ឆ្នាំ រស់នៅក្នុងទីក្រុង Guilin នៃតំបន់ Guangxi ប្រទេសចិន។ គាត់បានមើលថែម្តាយចាស់ជរារបស់គាត់ ដោយស្លៀសំលៀកបំពាក់ប្រពៃណៃឲ្យដូចបងស្រីរបស់ខ្លួនដែលបានស្លាប់។
បុរសរូបនោះបានថ្លែងប្រាប់ បណ្តាញវេទិការព៌តមានឌីជីថល Pear Video ថា គាត់ចាប់ផ្តើមស្លៀកពាក់ជាស្រី ក្រោយពេលម្តាយរបស់គាត់ចាប់ផ្តើមបង្ហាញសញ្ញាពីជម្ងឺប្រសៃប្រសាទ ដោយសារតែការស្លាប់របស់កូនស្រីរបស់គាត់ម្នាក់។
គាត់បន្ថែមថា ម្តាយរបស់គាត់ចាប់ផ្តើមជឿភ្លាមៗ ថាកូនស្រីរបស់គាត់បានត្រឡប់មកវិញ នៅពេលគាត់ស្លៀកពាក់ជាមនុស្សស្រី។
“គាត់សម្បាយចិត្តជាខ្លាំង ដូច្នេះខ្ញុំក៍នៅធ្វើបែបនេះរហូត។ ខ្ញុំបានរស់នៅជាបែបមនុស្សស្រីចាប់តាំងពីពេលនោះមក។ ខ្ញុំមិនមានសំលៀកបំពាក់បុរសទេ”។
បុរសដដែលបាននិយាយទៀតថា គាត់មិនមានការព្រួយបារម្ភអំពីអ្វីដែលមនុស្សគ្រប់គាត់បានគិតលើគាត់នោះទេ ពីព្រោះគាត់ធ្វើនេះ គឺដើម្បីម្តាយរបស់គាត់។
អ្នកចូលរួមបញ្ចេញមតិជាច្រើនបានសរសើរដល់បុរសរូបនោះ ដោយបានបញ្ជេញមតិថា ទង្វើរបស់គាត់បានធ្វើឲ្យពួកគេរំជួលចិត្តណាស់ ហើយនោះហើយគឺជាកាតព្វកិច្ចរបស់កូនប្រុស៕ សុភ័ក្ត្រ
