ភ្នំពេញ៖ លោក ឧកញ៉ា ឡេង ណាវ៉ាត្រា ម្ចាស់គម្រោងបុរី ឡេង ណាវ៉ាត្រា បានប្រកាសថា លោកនឹងប្រគល់ទ្រព្យសម្បត្តិរបស់គ្រួសារ រួមមានដីធ្លី និងយានយន្ត ជូនក្រសួងរៀបចំដែនដី នគរូបនីយកម្ម និងសំណង់ ដើម្បីចាត់ចែងតាមការគួរ ក្នុងការចូលរួមដោះស្រាយបញ្ហាពាក់ព័ន្ធគម្រោង 6A ខណៈលោកអះអាងថា មិនអាចបញ្ចប់គម្រោងនេះបានឡើយ។
លោក ឡេង ណាវ៉ាត្រា បានប្រកាសតាមរយៈបណ្ដាញសង្គមហ្វេសប៊ុក នៅថ្ងៃទី៨ ខែកញ្ញា ឆ្នាំ២០២៦ ដោយបង្ហាញពីការត្រៀមខ្លួនទទួលខុសត្រូវចំពោះបញ្ហាដែលកើតឡើងពីគម្រោង និងស្នើសុំការយោគយល់ពីរាជរដ្ឋាភិបាល ព្រមទាំងប្រជាពលរដ្ឋដែលពាក់ព័ន្ធ។
តាមការអះអាងរបស់លោក គម្រោង 6A ត្រូវការថវិកាបន្ថែមប្រមាណពី ២០ ទៅ ៣០ លានដុល្លារ ដើម្បីអាចបញ្ចប់បាន។ លោកបានឱ្យដឹងថា គម្រោងនេះត្រូវបានលក់ក្នុងតម្លៃសរុបប្រមាណ ១៨៥ លានដុល្លារ ខណៈការចំណាយរហូតមកដល់ពេលនេះមានប្រមាណ ២២១ លានដុល្លារ។
លោកបានទទួលស្គាល់ថា កំហុសសំខាន់ៗរបស់លោកមានពីរចំណុច គឺការយឺតយ៉ាវក្នុងការអនុវត្តគម្រោង និងការជំពាក់បំណុល ដែលបានធ្វើឱ្យការអភិវឌ្ឍគម្រោងជួបការលំបាក និងមិនអាចបញ្ចប់តាមការគ្រោងទុក។
លោក ឡេង ណាវ៉ាត្រា បានបញ្ជាក់ថា លោកត្រៀមទទួលខុសត្រូវតាមផ្លូវច្បាប់ចំពោះបញ្ហាដែលបានកើតឡើង និងស្នើសុំការយោគយល់ពីរាជរដ្ឋាភិបាល និងប្រជាពលរដ្ឋ ពាក់ព័ន្ធនឹងស្ថានភាពរបស់គម្រោង។
ជាមួយគ្នានេះ លោកបានប្រកាសថា នឹងសហការជាមួយក្រសួង និងស្ថាប័នពាក់ព័ន្ធ ១០០ភាគរយ ក្នុងការស៊ើបអង្កេត និងស្វែងរកដំណោះស្រាយចំពោះបញ្ហាដែលកំពុងកើតមាន ដោយមានគោលដៅឈានទៅរកការដោះស្រាយ និងបញ្ចប់គម្រោង 6A។
លោកក៏បានបញ្ជាក់ពីការត្រៀមប្រគល់ទ្រព្យសម្បត្តិរបស់គ្រួសារ ដើម្បីចូលរួមក្នុងដំណើរការដោះស្រាយបញ្ហា ខណៈការប្រកាសនេះកើតឡើងចំពេលមានការព្រួយបារម្ភជុំវិញការយឺតយ៉ាវ និងបញ្ហាហិរញ្ញវត្ថុរបស់គម្រោង។
ការប្រកាសរបស់លោក ឡេង ណាវ៉ាត្រា បង្ហាញពីការទទួលស្គាល់ចំពោះបញ្ហាហិរញ្ញវត្ថុ និងការលំបាកក្នុងការបញ្ចប់គម្រោង ព្រមទាំងការបង្ហាញឆន្ទៈសហការជាមួយអាជ្ញាធរ ដើម្បីស្វែងរកដំណោះស្រាយសម្រាប់ភាគីពាក់ព័ន្ធ៕រក្សាសិទ្ធិគ្រប់យ៉ាងដោយ CEN
