ភ្នំពេញ៖ឯកឧត្ដម ហួត ហៃ អភិបាលរងរាជធានីភ្នំពេញបានលើកឡើងថា៖ ទីលានចាក់សំរាមថ្មី នៅផ្លូវលេខ៥១ ភូមិទួលព្រិច ស្រុកអង្គស្នួល ខេត្តកណ្តាល នឹងបើកឱ្យដំណើរការចាក់សំរាមជាលើកដំបូង នៅថ្ងៃទី០១មករាឆ្នាំ២០២៧
ខាងមុខនេះ ដោយត្រូវផ្ទេរពីទីលានចាក់សំរាមចាស់នាខណ្ឌដង្កោ រាជធានីភ្នំពេញ។
ការលើកឡើងរបស់ ឯកឧត្ដម ហួត ហៃ បានធ្វើឡើងនាព្រឹកថ្ងៃទី១០ កញ្ញា ឆ្នាំ២០២៦នេះ ខណៈឯកឧត្ដម បានអញ្ជើញជាអធិបតីភាពតំណាងឯកឧត្ដម ឃួង ស្រេង អភិបាលរាជធានីភ្នំពេញ ក្នុងកិច្ចប្រជុំសាមញ្ញលើកទី២៨បស់ក្រុមប្រឹក្សារាជធានីភ្នំពេញ ឆ្នាំទី៣ អាណត្តិទី៤ ជាមួយ ឯកឧត្ដម ជួប ខុន សមាជិកក្រុមប្រឹក្សាតំណាងឯកឧត្ដម ម៉ប់ សារិន ប្រធានក្រុមប្រឹក្សារាជធានីភ្នំពេញនៅសាលារាជធានីភ្នំពេញ។
ឯកឧត្ដម ហួត ហៃ បន្តថា៖ ទីលានចាក់សំរាមថ្មីនេះ មានទំហំ១៤៣ហិចតា ដោយជំហានទី១បានរៀបចំរួចរាល់ ជាស្តង់ដា អន្តរជាតិតែម្តង។ការប្រមូលថវិកាពីការបង់ថ្លៃសំរាមនេះ យើងប្រមូលបានប្រមាណ២លានដុល្លារ ក្នុង១ខែ ។ ប៉ុន្តែចំនួននេះ ឯកឧត្ដម ហួត ហៃ បានបញ្ជាក់ថា យើងបានចំណាយមានចំនួនច្រើនជាងនេះ ពោលគឺនៅខាតបង់នូវឡើយទេ។ ក្រុមហ៊ុនប្រមូល ដឹកជញ្ជូនប្រមូលសំរាមទាំង៣ ប្រមូលសំរាមបានប្រមាណ៤១០០តោន ក្នុងមួយថ្ងៃ ខណៈដែលកាលពីមុន មានក្រុមហ៊ុនតែមួយ បរិមាណសំរាមដែលប្រមូលបាន មានត្រឹមតែ២៧០០តោនក្នុងមួយថ្ងៃប៉ុណ្ណោះ។
ឯកឧត្ដម ហួត ហៃ បានបន្តថា៖ ការបង្ក្រាបបទល្មើសឆបោកតាមប្រព័ន្ធបច្ចេកវិទ្យា(ONLINE SCAMS) អាជ្ញាធរនិងកងកម្លាំងរបស់រាជធានីភ្នំពេញ អនុវត្តការងារបានល្អប្រសើរ នោះគឺដោយសារខណ្ឌនីមួយៗបានម្ចាស់ការក្នុងការបង្ក្រាប ហើយពិសេសថែមទៀតនោះ គឺបានការសហការយ៉ាងល្អពីសំណាក់ប្រជាពលរដ្ឋនៅក្នុងមូលដ្ឋាន។ចំណែក រាជធានីភ្នំពេញទទួលបានពានរង្វាន់ពីអង្គការសុខភាពពិភពលោក លើកិច្ចខិតខំប្រឹងប្រែងក្នុងការលើកកម្ពស់សុវត្ថិភាពចរាចរណ៍ តាមរយៈការអនុវត្តគម្រោង “ការដឹកជញ្ជូនមានសុវត្ថិភាព សកម្ម និងលើកកម្ពស់សុខភាព ការជំរុញសុខភាព និងការកាត់បន្ថយវិសមភាពក្នុងការធើ្វដំណើរក្នុងទីក្រុង” គឺបានមកពីការចូលរួមខិតខំប្រឹងប្រែងទាំងអស់គ្នា ទាំងក្រុមប្រឹក្សារាជធានី រដ្ឋបាលរាជធានី ខណ្ឌ សង្កាត់និងមន្ទីរចំណុះឱ្យរដ្ឋបាលរាជធានីផងដែរ។
ការលើកឡើងបែបនេះ របស់ឯកឧត្ដម ហួត ហៃ បានធ្វើឡើង ដើម្បីឆ្លើយតបទៅនឹងការលើកសរសើររបស់ សមាជិកក្រុមប្រឹក្សារាជធានីភ្នំពេញថា៖ ក្នុងមួយខែកន្លងមកនេះ រដ្ឋបាលរាជធានីភ្នំពេញ បានបំពេញការងារបានយ៉ាងល្អ ទាំងការរក្សាសន្តិសុខ សណ្តាប់ធ្នាប់ជូនប្រជាពលរដ្ឋ ពិសេសការបង្ក្រាបទប់ស្លាត់បទល្មើសផ្សេងៗនិងការបង្ក្រាបបទល្មើសឆបោកតាមប្រព័ន្ធបច្ចេកវិទ្យា(ONLINE SCAMS) បានល្អប្រសើរ។ការទុកដាក់ គ្រប់គ្រងទុកដាក់សំរាមបានល្អនិងការជួលជុល ថែទាំផ្លូវ លូ ប្រឡាយបានល្អជាដើម។
ជាមួយគ្នានោះដែរឯកឧត្ដម ជួប ខុនសមាជិកក្រុមប្រឹក្សារាជធានី ក៏បានថ្លែងនូវការកោតសរសើរចំពោះ អាជ្ញាធររាជធានីភ្នំពេញផងដែរ ចំពោះការរៀបចំសន្តិសុខ សណ្តាប់ធ្នាប់បានល្អ ក្នុងការរៀបចំប្រឡងសញ្ញាបត្រមធ្យមសិក្សាទុតិយភូមិ ការបង្ក្រាបបទល្មើសឆបោកតាមប្រព័ន្ធបច្ចេកវិទ្យា(ONLINE SCAMS) បានល្អ និងការរៀបចំអនាម័យ បរិស្ថានបានល្អផងដែរ ព្រមទាំងចូលរួមអបអរសាទរ ដែលរាជធានីភ្នំពេញទទួលបានពានរង្វាន់ពីអង្គការសុខភាពពិភពលោក៕ រក្សាសិទ្ធិដោយ ៖សុទ្ធលី
