កាលពីថ្ងៃទី៩ ដល់ទី១១ ខែកញ្ញា ឆ្នាំ២០២៦ គណៈប្រតិភូក្លិបអ្នកកាសែតកម្ពុជា (ក.អ.ក) ដែលមានអ្នកសារ ព័ត៌មានជាតិ និងអន្តរជាតិ សរុបចំនួន ៤៧នាក់ (ស្រី ៧នាក់) មកពី ២៣ស្ថាប័នផ្សេងៗគ្នា បានចុះបំពេញ បេសកកម្មស្វែងយល់ផលប៉ះពាល់ក្រោយជម្លោះព្រំដែនពីរលើកកាលពីឆ្នាំ២០២៥ និងស្ថានភាពនៅក្នុងខេត្តព្រះវិហារ និងតំបន់រមណីយដ្ឋានប្រាសាទព្រះវិហារ។ កម្មវិធីនេះត្រូវបានរៀបចំឡើងដោយក្លិបអ្នកកាសែតកម្ពុជា (CCJ) សហការគាំទ្រដោយមជ្ឈមណ្ឌលសកម្មភាពកម្ចាត់មីនកម្ពុជា (CMAC) រដ្ឋបាលខេត្តព្រះវិហារ និងអាជ្ញាធរជាតិព្រះវិហារ។ នៅរសៀលថ្ងៃទី៩ ខែកញ្ញា ក្រុមអ្នកសារព័ត៌មានបានចូលរួមកិច្ចពិភាក្សាតុមូលជាមួយ ឯកឧត្តម គីម រិទ្ធី អភិបាល នៃគណៈអភិបាលខេត្តព្រះវិហារ ឯកឧត្តម គង់ ពុទ្ធិការ អគ្គនាយកអាជ្ញាធរជាតិព្រះវិហារ និងឧត្តមសេនីយ៍ អ៊ាន សុធា តំណាងអង្គភាពស៊ីម៉ាក់ ក្រោមការសម្របសម្រួលដោយលោក ពុយ គា ប្រធានក្លិបអ្នកកាសែតកម្ពុជា។ នៅក្នុងកិច្ច ពិភាក្សានេះ ឯកឧត្តមអភិបាលខេត្តបានជម្រាបជូនអំពីស្ថានភាពជនភៀសសឹកនៅក្នុងខេត្តព្រះវិហារ និងការខិតខំ ប្រឹងប្រែងរបស់រដ្ឋបាលខេត្តក្នុងការរៀបចំជម្រកបណ្ដោះអាសន្នសម្រាប់ជនភៀសសឹកដែលមិនទាន់អាចវិលត្រឡប់ ទៅកាន់ភូមិរបស់ពួកគាត់បានដោយសារសំណល់អាវុធយុទ្ធភណ្ឌមិនទាន់ផ្ទុះនៅសល់ក្រោយសង្គ្រាម និងស្ថានភាព
ភូមិសាស្ត្រងាយរងគ្រោះ និងកម្មវិធីគោលនយោបាយនានាដែលរាជរដ្ឋាភិបាលបានដាក់ចេញដើម្បីជួយសម្រួល ដល់ជីវភាពប្រចាំថ្ងៃរបស់ជនភៀសសឹក។
ជាមួយគ្នានោះ ឯកឧត្តមអគ្គនាយកអាជ្ញាធរជាតិព្រះវិហារ បានជម្រាបជូនអំពីស្ថានភាពខូចខាតប្រាសាទព្រះវិហារ ការបំផ្លិចបំផ្លាញកិច្ចការអភិរក្ស និងជួសជុលប្រាសាទព្រះវិហារដែលបានអនុវត្តជាង១៨ឆ្នាំកន្លងទៅដោយអាជ្ញាធរ ជាតិព្រះវិហារ គម្រោងអភិរក្សនិងជួសជុលគោបុរៈទី៥ របស់រាជរដ្ឋាភិបាលឥណ្ឌា គម្រោងអភិរក្សនិងជួសជុល ជណ្តើរខាងជើង របស់មូលនិធិសា្ថនទូតសហរដ្ឋអាមេរិកដើម្បីអភិរក្សសម្បត្តិវប្បធម៌។ ឯកឧត្តមអគ្គនាយក ក៏បាន ជម្រាបជូនអំពីកិច្ចខិតខំប្រឹងប្រែងរបស់ក្រសួងវប្បធម៌ និងវិចិត្រសិល្បៈ ក្នុងការធ្វើយុទ្ធនាការក្នុងវេទិកាអន្តរជាតិ ពិសេសអង្គការយូណេស្កូ និងគណៈកម្មការបេតិកភណ្ឌពិភពលោក ហើយបានទទួលបេសកកម្មប្រឹក្សារបស់ តំណាងគណៈកម្មការបេតិកភណ្ឌពិភពលោក និងតំណាងក្រុមប្រឹក្សាអន្តរជាតិស្តីពីប្រាសាទនិងរមណីយដ្ឋាន ដោយបានផ្តល់អនុសាសន៍សំខាន់ៗសម្រាប់សង្គ្រោះប្រាសាទព្រះវិហារក្នុងពេលបន្ទាន់ រយៈពេលខ្លី មធ្យម និងវែង។ ឯកឧត្តមតំណាងមជ្ឈមណ្ឌលកម្ចាត់មីនកម្ពុជា បានជម្រាបជូនអំពីស្ថានភាពអាវុធយុទ្ធភណ្ឌមិនទាន់ផ្ទុះនៅលើ ប្រាសាទព្រះវិហារ និងលទ្ធផលការបោសសម្អាតកន្លងមក។ បន្ទាប់ពីបញ្ចប់សន្និសីទសារព័ត៌មាន ឯកឧត្តមអភិបាលខេត្ត បាននាំប្រតិភូសារព័ត៌មានចុះពិនិត្យផ្ទាល់ស្ថានភាពភូមិតាកឹងបៃតង ដែលកំពុងរៀបចំដោយរដ្ឋបាល ខេត្តសម្រាប់ប្រជាជនភៀសសឹក។
នៅថ្ងៃទី១០ ខែកញ្ញា គណៈប្រតិភូបានចុះពិនិត្យការខូចខាតប្រាសាទព្រះវិហារសម្របសម្រួលដោយអាជ្ញាធរជាតិ ព្រះវិហារ និងមជ្ឈមណ្ឌលកម្ចាត់មីនកម្ពុជា។ គណៈប្រតិភូបានពិនិត្យជាក់ស្តែងស្ថានភាពគ្រាប់ផ្លោងដែលបានបង្ក ការខូចខាតចំនួន ៥៦២កន្លែង និងលទ្ធផលនៃការខិតខំប្រឹងប្រែងសង្គ្រោះប្រាសាទព្រះវិហារ តាមរយៈជំនួយ សង្គ្រោះបន្ទាន់ពីអង្គការយូណេស្កូ ដោយមានការចូលរួមពីមូលនិធិគណៈកម្មការបេតិកភណ្ឌពិភពលោក មូលនិធិ អង្គការ ALIPH និងតំណាងប្រតិភូអចិន្ត្រៃយ៍បារាំងប្រចាំយូណេស្កូ បានចំនួនប្រមាណ ២០ម៉ឺនដុល្លារ ជូនរដ្ឋាភិបាល កម្ពុជាអនុវត្តអនុសាសន៍របស់បេសកកម្មអ្នកជំនាញការអន្តរជាតិខាងលើ អនុវត្តដោយអាជ្ញាធរជាតិព្រះវិហារ សហការនិងសម្របសម្រួលពីការិយាល័យយូណេស្កូប្រចាំកម្ពុជា មជ្ឈមណ្ឌលកម្ចាត់មីនកម្ពុជា វិទ្យាស្ថានបច្ចេកវិទ្យា កម្ពុជា និងអន្តរជាតិលើសកម្មភាពមួយចំនួនដូចជា៖
បោសសម្អាតសំណល់អាវុធយុទ្ធភណ្ឌមិនទាន់ផ្ទុះបរិវេណប្រាសាទព្រះវិហារនិងតំបន់ជុំវិញប្រមាណ ៧០ ហិកតា
ទល់ទ្ររចនាសម្ព័ន្ធប្រាសាទពីការដួលរលំចំនួន ២៣កន្លែង
ប្រមូលបំណែកថ្មប្រាសាទនិងក្បាច់ចម្លាក់ចំនួនប្រមាណ ៧ម៉ឺនបំណែក
ចងក្រងឯកសារស្ថានភាពខូចខាតប្រាសាទព្រះវិហារតាមរយៈការថតរូបភាព វីដេអូ និង 3D
ស្តារប្រព័ន្ធផ្លូវទឹកបុរាណដើម្បីបញ្ចៀសផលប៉ះពាល់ប្រាសាទបន្ថែមទៀត។
នៅថ្ងៃទី១១ ខែកញ្ញា ឆ្នាំ២០២៦ គណៈប្រតិភូបានធ្វើសន្និសីទព័ត៌មានជាមួយ ឯកឧត្តមប្រតិភូរាជរដ្ឋាភិបាល ទទួលបន្ទុកមជ្ឈមណ្ឌលកម្ចាត់មីនកម្ពុជា ដោយឯកឧត្តមបានបញ្ជាក់ថាក្នុងជម្លោះទាំងពីរលើកកន្លងមក យោធាថៃ បានបាញ់គ្រាប់កាំភ្លើងធំប្រមាណ ១ ៥៩៩គ្រាប់ មកលើប្រាសាទព្រះវិហារ ហើយបន្សល់នូវអាវុធយុទ្ធភណ្ឌមិន ទាន់ផ្ទុះចំនួន ៩៧៧គ្រាប់ និងជ្រួន ៤គ្រឿង ។ គណៈប្រតិភូក៏បានធ្វើទស្សនកិច្ចសារមន្ទីរមីន ពិនិត្យមើលសំណល់ អាវុធយុទ្ធភណ្ឌរបស់យោធាថៃដែលបានប្រើប្រាស់លើប្រាសាទព្រះវិហារ។
អាជ្ញាធរជាតិព្រះវិហារ សូមវាយតម្លៃខ្ពស់ចំពោះប្រធានក្លិបសារព័ត៌មានកម្ពុជា និងប្រតិភូសារព័ត៌មានទាំងអស់ដែល បានចុះពិនិត្យ និងប្រមូលព័ត៌មានដោយផ្ទាល់ដើម្បីជម្រាបជូនជនរួមជាតិ និងអន្តរជាតិ អំពីស្ថានភាពជាក់ស្តែងនៃ ជនភៀសសឹក ការខូចខាតប្រាសាទព្រះវិហារ ការខូចខាតហេដ្ឋារចនាសម្ព័ន្ធសាធារណៈ។ អាជ្ញាធរជាតិព្រះវិហារក៏ សូមថ្លែងអំណរគុណដល់រាជរដ្ឋាភិបាល អង្គការយូណេស្កូ គណៈកម្មការបេតិកភណ្ឌពិភពលោក និងអង្គការ ALIPH ដែលបានផ្តល់មូលនិធិសង្គ្រោះបន្ទាន់ប្រាសាទព្រះវិហារ និងស្ថាប័នពាក់ព័ន្ធទាំងអស់ដែលបានចូលរួម អនុវត្តយ៉ាងសកម្មនាពេលកន្លងមកដើម្បីថែរក្សា ការពារ និងសង្គ្រោះប្រាសាទព្រះវិហារ៕រក្សាសិទ្ធិដោយ ៖សុទ្ធលី
