ភ្នំពេញ៖ កម្លាំងគយ និងរដ្ឋាករ សហការជាមួយនគរបាលអន្តោប្រវេសន៍ បានបើកប្រតិបត្តិការបង្ក្រាបការជួញដូរគ្រឿងញៀនឆ្លងដែនទ្រង់ទ្រាយធំ នៅអាកាសយានដ្ឋានអន្តរជាតិតេជោ ដោយឃាត់ខ្លួនជនបរទេសចំនួន ៣នាក់ និង រឹបអូសសារធាតុញៀនសង្ស័យជាង ៧៩គីឡូក្រាម។
ប្រតិបត្តិការនេះធ្វើឡើងនៅថ្ងៃទី៩ ខែកញ្ញា ឆ្នាំ២០២៦ នៅស្ថានីយអ្នកដំណើរចេញ ខណៈជនសង្ស័យទាំង ៣នាក់ កំពុងត្រៀមធ្វើដំណើរចាកចេញពីប្រទេសកម្ពុជា។
តាមការត្រួតពិនិត្យយ៉ាងលម្អិត ក្រុមការងារចម្រុះបានរកឃើញរុក្ខជាតិក្រៀមសង្ស័យជាគ្រឿងញៀនប្រភេទកញ្ឆា ចំនួន ១៤៦ដុំ មានទម្ងន់សុទ្ធសរុប ៧៣,០១៧គីឡូក្រាម។
ក្រៅពីនេះ មន្ត្រីក៏បានរកឃើញម្សៅក្រាមពណ៌សសង្ស័យជាគ្រឿងញៀនប្រភេទហេរ៉ូអ៊ីន ទម្ងន់សុទ្ធសរុប ៦,២១៩ក្រាម ឬប្រមាណ ៦,២គីឡូក្រាម។
វត្ថុតាងទាំងអស់មានទម្ងន់សរុបប្រមាណ ៧៩,២៣៦គីឡូក្រាម ដែលត្រូវបានសមត្ថកិច្ចរឹបអូស និងរក្សាទុក ដើម្បីបន្តនីតិវិធី។
ក្រោយបញ្ចប់នីតិវិធីបឋម និងរៀបចំកំណត់ហេតុពាក់ព័ន្ធនឹងបទល្មើសច្បាប់គយរួច ជនសង្ស័យទាំង ៣នាក់ រួមជាមួយវត្ថុតាង និងសម្ភារៈពាក់ព័ន្ធ ត្រូវបានប្រគល់ជូន មន្ទីរប្រឆាំងគ្រឿងញៀន ដើម្បីបន្តស៊ើបអង្កេត និងចាត់ការតាមនីតិវិធីច្បាប់។
ការបង្ក្រាបនេះត្រូវបានចាត់ទុកថា ជាករណីជួញដូរគ្រឿងញៀនឆ្លងដែនមួយក្នុងចំណោមករណីដែលមានបរិមាណសារធាតុញៀនច្រើន ដែលត្រូវបានរកឃើញនៅតំបន់ច្រកចេញប្រទេស៕រក្សាសិទ្ធិគ្រប់យ៉ាងដោយ CEN
