ប្រមុខរដ្ឋស្តីទី បញ្ចប់មុខតំណែងលោក ពេជ្រ ស្រស់ ព្រមទាំងសមាជិក ៥រូបទៀត ពីឧត្តមក្រុមប្រឹក្សាពិគ្រោះ និងផ្តល់យោបល់

ភ្នំពេញ៖ សម្តេចតេជោ ហ៊ុន សែន ប្រមុខរដ្ឋស្តីទី បានចេញព្រះរាជក្រឹត្យផ្លូវការ បញ្ចប់មុខតំណែងលោក ពេជ្រ ស្រស់ ព្រមទាំងសមាជិកគណបក្សយុវជនកម្ពុជាចំនួន ៤រូបផ្សេងទៀត ពីសមាសភាពប្រតិភូនៃឧត្តមក្រុមប្រឹក្សាពិគ្រោះ និងផ្តល់យោបល់។
ទន្ទឹមនឹងនេះដែរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក៏បានចេញអនុក្រឹត្យបញ្ចប់មុខតំណែងសមាជិកប្រតិភូគណបក្សយុវជនកម្ពុជា ១រូបបន្ថែមទៀត (ឋានៈស្មើអគ្គនាយករង) ផងដែរ ដែលធ្វើឱ្យសមាសភាពប្រតិភូសរុបចំនួន ៦រូប ត្រូវ៖បញ្ចប់ភារកិច្ចជាផ្លូវការ។
ការសម្រេចចេញព្រះរាជក្រឹត្យ និងអនុក្រឹត្យនេះ បានធ្វើឡើងបន្ទាប់ពីលោក ពេជ្រ ស្រស់ ប្រធានគណបក្សយុវជនកម្ពុជា បានដាក់លិខិតគោរពស្នើសុំដោយផ្ទាល់ជូន សម្តេចធិបតី ហ៊ុន ម៉ាណែត ដើម្បីបញ្ចប់សមាជិកភាពរូបលោក និងសហការីទាំង ៦រូប ដោយសារតែគណបក្សយុវជនកម្ពុជាគ្រោងនឹងប្រកាសរំលាយខ្លួននាពេលខាងមុខ។
លោក ពេជ្រ ស្រស់ បានគូសបញ្ជាក់យ៉ាងច្បាស់ថា ការរំលាយគណបក្សនេះ គឺជាការគោរពសន្យារបស់លោកចំពោះសាធារណជន ដែលធ្លាប់បានប្រកាសថា លោកនឹងធ្វើនយោបាយត្រឹមតែរយៈពេល ១០ឆ្នាំប៉ុណ្ណោះ៕ រក្សាសិទ្ធិដោយ ៖សុទ្ធលី