ខេត្តកណ្ដាល៖ អ្នកបើករថយន្តសាលាឯកជនម្នាក់ នៅស្រុកអង្គស្នួល ខេត្តកណ្ដាល ត្រូវបានសាលាដំបូងខេត្តកណ្ដាល សម្រេចចេញដីកាឃុំខ្លួនដាក់ពន្ធនាគារ បន្ទាប់ពីគាត់ ត្រូវបានសង្ស័យថា: បានប្រព្រឹត្តបទល្មើសផ្លូវភេទលើកុមារីដែលជាសិស្សសាលាជាច្រើននាក់។
សមត្ថកិច្ចបានឲ្យដឹងថា: ជនសង្ស័យ រូបនេះ មានឈ្មោះ ស៊ឹម សុគា អាយុ៣៥ឆ្នាំ មុខរបរ: ជាអ្នកបើករថយន្ត និង មានទីលំនៅក្នុងភូមិព្រៃសំរោង ឃុំបែកចាន ស្រុកអង្គស្នួល ខេត្តកណ្ដាល។
តាមការស៊ើបអង្កេតរបស់សមត្ថកិច្ច ជនសង្ស័យត្រូវបានសង្ស័យថា បានចាប់រំលោភកុមារីចំនួន៣នាក់ និង មានការបៀតបៀនកេរខ្មាសលើកុមារីជាសិស្សសាលានាក់ ផ្សេងទៀត។
ករណីនេះ ត្រូវបានសមត្ថកិច្ចនៃស្នងការដ្ឋាននគរបាលខេត្តកណ្ដាល សហការជាមួយអង្គភាពការពារកុមារ (CPU) ចុះស្រាវជ្រាវ បន្ទាប់ពីទទួលបានព័ត៌មានពាក់ព័ន្ធនឹងសកម្មភាពរបស់ជនសង្ស័យ។
យោងតាមលទ្ធផលស៊ើបអង្កេត សមត្ថកិច្ចជំនាញ បានរកឃើញថា- នៅក្នុងករណីនេះ ក៏មានការជាប់ពាក់ព័ន្ធនឹងការផលិត និង កាន់កាប់រូបភាព ឬសម្ភារៈអាសអាភាសកុមារ ព្រមទាំងបទល្មើសរំលោភសេពសន្ថវៈមានស្ថានទម្ងន់ទោសទាក់ទងនឹងជនរងគ្រោះ។
ករណីខាងលើ ត្រូវបានរាយការណ៍ថា: បានកើតឡើងក្នុងអំឡុងខែកក្កដា ឆ្នាំ២០២៥ និង ខែសីហា ឆ្នាំ២០២៦ សាលាអន្តរជាតិឯកជនមួយកន្លែង ស្ថិតនៅភូមិបឹង ឃុំសំរោងលើ ស្រុកអង្គស្នួល ខេត្តកណ្ដាល។
បច្ចុប្បន្ននេះ ជនសង្ស័យត្រូវបានសាលាដំបូងខេត្តកណ្ដាល ចេញដីកាឃុំខ្លួន នៅក្នុង ពន្ធនាគារខេត្ត កណ្តាល ដើម្បីរង់ចាំការអនុវត្តនីតិវិធីតាមច្បាប់៕រក្សាសិទ្ធិគ្រប់យ៉ាង ដោយ CEN
