ខេត្តបាត់ដំបង៖ លោកមេភូមិត្រាង អាយុ៧៥ឆ្នាំ បានបាត់ខ្លួនក្នុងទឹកជំនន់ បន្ទាប់ពីទូកស្មាច់មួយគ្រឿង ដែលគាត់់ ជិះ បានក្រឡាប់ ដោយសារចរន្តទឹកហូរកួចខ្លាំង ខណៈអ្នករួមដំណើរ៤នាក់ទៀតត្រូវបានសង្គ្រោះទាន់ពេល។
ហេតុការណ៍នេះមកបានកើតឡើងនៅវេលាម៉ោងប្រមាណ៨ព្រឹក ថ្ងៃទី៧ ខែតុលា ឆ្នាំ២០២៦ នៅចំណុចក្នុងឃុំអូរតាគី ស្រុកថ្មគោល ខេត្តបាត់ដំបង។
តាមការបញ្ជាក់របស់លោក វរសេនីយ៍ឯក សេង លុច អធិការនគរបាលស្រុកថ្មគោល
បានឱ្យដឹងថា: មុនកើតហេតុ លោក ញ៉ូង រឿន ដែលមាន អាយុ៧៥ឆ្នាំ ជាមេភូមិត្រាង និងអ្នករួមដំណើរ៤នាក់ទៀត បានជិះទូកទៅជួបក្រុមការងារថ្នាក់ជាតិ នៅវត្តត្រស់ ដើម្បីចូលរួមពិនិត្យស្ថានភាពទឹកជំនន់ និងសួរសុខទុក្ខប្រជាពលរដ្ឋដែលរងគ្រោះដោយទឹកជំនន់។
នៅពេលធ្វើដំណើរដល់ចំណុចក្បែរស្ពានខាងក្រោយវត្តត្រស់ ស្រាប់តែទូកបានជួបចរន្តទឹកហូរកួចខ្លាំង បណ្ដាលឱ្យក្រឡាប់។
អ្នករួមដំណើរ៤នាក់បានតោងទូកជាប់ និងត្រូវបានជួយសង្គ្រោះទាន់ពេល ខណៈលោកមេភូមិត្រូវចរន្តទឹកហូរកួចយកទៅបាត់។
គិតត្រឹមម៉ោង ១៖៣០នាទីរសៀល ថ្ងៃទី ៨ ខែតុលា កម្លាំងសមត្ថកិច្ច និងប្រជាពលរដ្ឋរាប់សិបនាក់បានបន្តប្រតិបត្តិការស្វែងរកលោក ញ៉ូង រឿន ប៉ុន្តែមិនទាន់រកឃើញនៅឡើយទេ។
សមត្ថកិច្ចបានអំពាវនាវឱ្យប្រជាពលរដ្ឋបង្កើនការប្រុងប្រយ័ត្ននៅពេលធ្វើដំណើរតាមផ្លូវទឹកក្នុងតំបន់ដែលកំពុងរងទឹកជំនន់ ជាពិសេសតំបន់ដែលមានចរន្តទឹកហូរខ្លាំង ដើម្បីចៀសវាងគ្រោះថ្នាក់៕រក្សាសិទ្ធិគ្រប់យ៉ាងដោយ CEN
