ភ្នំពេញ៖ ស្ត្រីម្នាក់ដែលត្រូវបានចោទប្រកាន់ថា បានយកទឹកអាស៊ីតជះលើប្តី បណ្តាលឱ្យរងរបួសធ្ងន់ធ្ងរលើផ្ទៃមុខ និងដងខ្លួន ត្រូវបានចៅក្រមស៊ើបសួរ នៃសាលាដំបូងរាជធានីភ្នំពេញ សម្រេចឃុំខ្លួនដាក់ពន្ធនាគារជាបណ្តោះអាសន្ន។
ស្ត្រី ត្រូវចោទ រូបនេះ មាន ឈ្មោះ សុវណ្ណ កែវភាជ ហៅ ជូឡាយ ភេទស្រី អាយុ ៦៤ឆ្នាំ មុខរបរកោសខ្យល់ចល័ត ស្នាក់នៅបន្ទប់ជួលគ្មានលេខ នៃផ្ទះលេខ ៤B ផ្លូវលេខ ២៧១ស្ទួន សង្កាត់បឹងសាឡាង ខណ្ឌទួលគោក រាជធានីភ្នំពេញ។
ស្ត្រីរូបនេះត្រូវបានសមត្ថកិច្ចនៃអធិការដ្ឋាននគរបាលខណ្ឌទួលគោក សហការជាមួយនគរបាលព្រហ្មទណ្ឌកម្រិតធ្ងន់រាជធានីភ្នំពេញ ស្រាវជ្រាវ និងឃាត់ខ្លួនកាលពីរសៀលថ្ងៃទី២ ខែតុលា ឆ្នាំ២០២៦ បន្ទាប់ពីសង្ស័យថា បានយកទឹកអាស៊ីតជះលើប្តីរបស់ខ្លួននៅបន្ទប់ជួលខាងលើ។
ហេតុការណ៍នេះ បានបណ្តាលឱ្យជនរងគ្រោះឈ្មោះ ឡុង ណារ៉េត ភេទប្រុស អាយុ ៦៦ឆ្នាំ មុខរបររត់ម៉ូតូឌុប (ត្រូវជាប្តី) រងរបួសធ្ងន់ធ្ងរនៅលើផ្ទៃមុខ និងដងខ្លួន។
ក្រោយឃាត់ខ្លួន សមត្ថកិច្ចបានកសាងសំណុំរឿងបញ្ជូនស្ត្រីជាប់សង្ស័យទៅអយ្យការអមសាលាដំបូងរាជធានីភ្នំពេញ ដើម្បីចាត់ការតាមនីតិវិធីច្បាប់។
រហូតដល់រសៀលថ្ងៃទី៧ ខែតុលា ឆ្នាំ២០២៦ ចៅក្រមស៊ើបសួរបានសម្រេចឃុំខ្លួនស្ត្រីរូបនេះជាបណ្តោះអាសន្ន ពីបទ «ហិង្សាដោយចេតនា មានស្ថានទម្ងន់ទោស» តាមមាត្រា ២១៨ នៃក្រមព្រហ្មទណ្ឌ។
យោងតាមបទចោទប្រកាន់ខាងលើនេះ, ស្ត្រីត្រូវចោទ រូបនេះ
អាចប្រឈមការផ្តន្ទាទោសដាក់ពន្ធនាគារពី ២ឆ្នាំ ដល់ ៥ឆ្នាំ និងពិន័យជាប្រាក់ពី ៤លានរៀល ដល់ ១០លានរៀល ប្រសិន តុលាការ រកឃើញ ពិរុទ្ធភាព៕រក្សាសិទ្ធិគ្រប់យ៉ាងដោយ CEN
