ភ្នំពេញ: អតីតនាយកប្រតិបត្តិនៃភូមិកុមារ អង្គការ សុវណ្ណកុមារ លោក សុធា អរុណ ត្រូវបានសមត្ថកិច្ចនគរបាលកម្ពុជាចាប់ខ្លួននៅខេត្តក្រចេះ ក្រោយរត់គេចខ្លួនអស់រយៈពេល៥ឆ្នាំ ពាក់ព័ន្ធនឹងបទល្មើសរំលោភសេពសន្ថវៈលើកុមារ ហិង្សាលើអនីតិជន និងឆបោកប្រាក់បរិច្ចាគជាង១,៤លានដុល្លារអាមេរិក។
យោងតាមសេចក្តីប្រកាសព័ត៌មានបន្ទាន់ លោក សុធា អរុណ ត្រូវបានចាប់ខ្លួននៅថ្ងៃទី១៩ ខែតុលា ឆ្នាំ២០២៦ ដោយមន្ត្រីនគរបាលក្រោមការដឹកនាំរបស់លោក ឌី វិជ្ជា អគ្គស្នងការរងនគរបាលជាតិ។ បន្ទាប់ពីការចាប់ខ្លួន លោកត្រូវបានបញ្ជូនទៅពន្ធនាគារនៅរាជធានីភ្នំពេញ ដើម្បីអនុវត្តទោសដែលតុលាការបានសម្រេច។
លោកត្រូវបានផ្តន្ទាទោសដាក់ពន្ធនាគារសរុប២២ឆ្នាំ ពាក់ព័ន្ធនឹងបទរំលោភសេពសន្ថវៈលើកុមារពីររូប បទហិង្សាដោយចេតនាមានស្ថានទម្ងន់ទោស និងការបង្អត់អាហារ ឬខ្វះការថែទាំចំពោះអនីតិជនដែលស្ថិតក្រោមការមើលថែរបស់លោក ព្រមទាំងបទឆបោកប្រាក់ជាង១,៤លានដុល្លារអាមេរិក ដែលជាថវិកាបរិច្ចាគសម្រាប់ផ្គត់ផ្គង់កុមារ។
លោក សុធា អរុណ បានកាន់តំណែងជានាយកប្រតិបត្តិនៃអង្គការ សុវណ្ណកុមារ អស់រយៈពេលជាង១៥ឆ្នាំ ចាប់តាំងពីអង្គការនេះត្រូវបានបង្កើតឡើងក្នុងឆ្នាំ២០០៣ រហូតដល់លោកត្រូវបានបញ្ឈប់ពីការងារនៅខែសីហា ឆ្នាំ២០១៩។
ក្នុងតួនាទីនេះ លោកមានទំនួលខុសត្រូវលើការថែទាំកុមារកំព្រា និងកុមារដែលត្រូវបានបោះបង់ចោលជាង៥០នាក់។
សាលាដំបូងរាជធានីភ្នំពេញបានផ្តន្ទាទោសលោកក្នុងសំណុំរឿងចំនួន៤ ដាច់ដោយឡែកពីគ្នា។ សាលក្រមក្នុងសំណុំរឿងឆបោកត្រូវបានប្រកាសនៅថ្ងៃទី២២ ខែមីនា ឆ្នាំ២០២៣ ខណៈសាលក្រមពាក់ព័ន្ធនឹងបទរំលោភសេពសន្ថវៈចំនួនពីរករណី និងបទហិង្សាលើកុមារ ត្រូវបានប្រកាសនៅថ្ងៃទី៣ ខែឧសភា ឆ្នាំ២០២៣។
តុលាការបានផ្តន្ទាទោសលោកឱ្យជាប់ពន្ធនាគាររយៈពេល៨ឆ្នាំសម្រាប់បទរំលោភសេពសន្ថវៈនីមួយៗ ៤ឆ្នាំសម្រាប់បទហិង្សាដោយចេតនាមានស្ថានទម្ងន់ទោស និងការបង្អត់អាហារ ឬខ្វះការថែទាំចំពោះអនីតិជនអាយុក្រោម១៥ឆ្នាំ ព្រមទាំង២ឆ្នាំសម្រាប់បទឆបោក។
សាលាឧទ្ធរណ៍រាជធានីភ្នំពេញបានតម្កល់ការផ្តន្ទាទោសទាំងនេះ ខណៈតុលាការកំពូលបានតម្កល់សាលដីកាក្នុងសំណុំរឿងហិង្សាលើកុមារនៅខែឧសភា ឆ្នាំ២០២៤។
លោកមិនបានចូលរួមសវនាការណាមួយឡើយ។
សេចក្តីប្រកាសព័ត៌មានបានរៀបរាប់ពីផលប៉ះពាល់ធ្ងន់ធ្ងរលើកុមារដែលស្ថិតក្រោមការថែទាំរបស់លោក ដោយបញ្ជាក់ថា កុមារដែលហ៊ានសួរដេញដោលលោក ត្រូវបានបណ្តេញចេញពីភូមិកុមារ និងបញ្ជូនទៅរស់នៅជាមួយគ្រួសារវិញ ទោះបីជាបរិស្ថានរស់នៅរបស់ពួកគេមិនមានសុវត្ថិភាពក៏ដោយ។
ក្មេងជំទង់ស្រីម្នាក់ ដែលធ្លាប់មានរូបថតនៅលើក្របរបាយការណ៍ប្រចាំឆ្នាំរបស់អង្គការ ក្រោយមកត្រូវបានរកឃើញថាកំពុងរស់នៅក្នុងសហគមន៍អនាធិបតេយ្យមួយនៅរាជធានីភ្នំពេញ។
ចំណែកក្មេងប្រុសអាយុ១៥ឆ្នាំម្នាក់ ត្រូវបានរកឃើញនៅក្នុងពន្ធនាគារមនុស្សពេញវ័យ បន្ទាប់ពីត្រូវបានលោកបញ្ជូនទៅរស់នៅជាមួយគ្រួសារមួយដែលខ្វះខាតជីវភាព ហើយត្រូវរកប្រាក់ចិញ្ចឹមជីវិតតាមរយៈការដឹកសាកសពឱ្យវត្តមួយកន្លែង។
ភូមិកុមារនេះត្រូវបានបង្កើតឡើងក្នុងឆ្នាំ២០០៣ ដោយលោកស្រី Elizabeth Ross Johnson ហើយមូលនិធិគ្រួសាររបស់លោកស្រីបានវិនិយោគប្រាក់រាប់លានដុល្លារអាមេរិក ដើម្បីផ្គត់ផ្គង់កុមារដែលស្ថិតក្រោមការថែទាំរបស់អង្គការ។
ទោះជាយ៉ាងណា សេចក្តីប្រកាសព័ត៌មានបានបញ្ជាក់ថា ខណៈកុមារដែលស្ថិតក្រោមការមើលថែរបស់លោក សុធា អរុណ ត្រូវបានបង្អត់អាហារ និងវាយដំ លោកបានយកប្រាក់ដែលបម្រុងទុកសម្រាប់ផ្គត់ផ្គង់ពួកគេទៅប្រើប្រាស់សម្រាប់ផលប្រយោជន៍ផ្ទាល់ខ្លួន។
លោកត្រូវបានចោទប្រកាន់ថាបានសាងសង់វីឡាដ៏ប្រណិតមួយដែលមានអាងហែលទឹក តម្លៃ២២.០០០ដុល្លារអាមេរិក ដោយប្រើប្រាស់ថវិការបស់អង្គការ។
លោកក៏បានទិញដីនៅតាមបណ្តាខេត្តនានា វិនិយោគលើចម្ការកៅស៊ូមួយនៅខេត្តមណ្ឌលគិរី និងដំណើរការអាជីវកម្មផ្តល់ប្រាក់កម្ចីដោយគ្មានអាជ្ញាប័ណ្ណ ដោយប្រើប្រាស់ប្រាក់របស់អង្គការ។
លើសពីនេះ លោកត្រូវបានចោទប្រកាន់ថាបានព្យាយាមគ្រប់គ្រងអង្គការតាមផ្លូវច្បាប់ ដោយផ្លាស់ប្តូរឈ្មោះដែលបានចុះបញ្ជីនៅក្រសួងសង្គមកិច្ច អតីតយុទ្ធជន និងយុវនីតិសម្បទា ដោយមិនបានជូនដំណឹងដល់ក្រុមប្រឹក្សាភិបាល។
សាលាដំបូងរាជធានីភ្នំពេញបានចេញដីកាចាប់ខ្លួនលោក សុធា អរុណ និងបក្ខពួកនៅខែកក្កដា និងខែតុលា ឆ្នាំ២០២១ ព្រមទាំងនៅខែឧសភា ឆ្នាំ២០២៣។
ក្នុងរយៈពេល៥ឆ្នាំនៃការរត់គេចខ្លួន សេចក្តីប្រកាសព័ត៌មានបានឱ្យដឹងថា លោក សុធា អរុណ និងបក្ខពួកបានគំរាមសម្លាប់ថ្នាក់គ្រប់គ្រងរបស់អង្គការ សុវណ្ណកុមារ និងកុមារដែលរស់នៅក្នុងភូមិកុមារ។
ពួកគេក៏ត្រូវបានចោទប្រកាន់ថាបានប្តឹងដោយគ្មានមូលដ្ឋានប្រឆាំងនឹងអ្នកតំណាងស្របច្បាប់របស់អង្គការ កែប្រែភស្តុតាង និងដាក់សម្ពាធលើសាក្សីជាកុមារឱ្យដកចម្លើយដែលបានផ្តល់ក្រោមសម្បថផងដែរ៕រក្សាសិទ្ធិគ្រប់យ៉ាងដោយCEN
