តាកែវ ៖ គ្រាប់យុទ្ធភ័ណ្ឌមិនទាន់ផ្ទុះសល់ពីសម័យសង្គ្រាមចំនួន១០គ្រាប់ បន្ថែមទៀត ត្រូវបានកម្លាំងជំនាញ នៃស្នងការដ្ឋាននគរបាលខេត្តតាកែវសហការ និងអង្គភាពកំចាត់មីន(ស៊ីម៉ាក់)ចុះប្រមូលយកមកបំផ្លាញចោល។
ការចុះទៅប្រមូលគ្រាប់មិនទាន់ផ្ទុះបានយ៉ាងសន្ធឹកសន្ធាប់នេះគឺធ្វើឡើងក្រោយពីកម្លាំងជំនាញនៃស្នងការនគរបាលខេត្តតាកែវទទួលបានព័ត៌មានពីប្រជាពលរដ្ឋដែលរាយការណ៍ និងរហូតដល់ថ្ងៃទី០៦ ខែវិច្ឆិកា ឆ្នាំ២០១៧ កម្លាំងការិយាល័យគ្រប់គ្រងអាវុធគ្រឿងផ្ទុះនៃស្នងការដ្ឋាននគរបាលខេត្ត បានចុះសហការជាមួយកម្លាំងប៉ុស្តិ៍នគរបាលរដ្ឋបាលត្រពាំងក្រញួងនិងកម្លាំងជំនាញស៊ីម៉ាក់ទៅប្រមូលគ្រាប់មិនទាន់ផ្ទុះសល់ពីសម័យសង្គ្រាម នៅចំនុចភូមិបុស្សតាផង់ ឃុំត្រពាំក្រញ៉ូង ស្រុកត្រាំកក់ បានចំនួន១០គ្រាប់។ តាមការឲ្យដឹងពីសមត្ថកិច្ចជំនាញបានប្រាប់ថា គ្រាប់ដែលប្រមូលបាននោះរួមមាន÷ ប្រភេទ៨១មមចំនួន០២គ្រាប់ ប្រភេទ៦០មមចំនួន០៤គ្រាប់ ប្រភេទB៤០ចំនួន០១គ្រាប់និងប្រភេទមីន៦៩ចំនួន០៣គ្រាប់ ។
បច្ចុប្បន្នក្រោយពីប្រមូលបានគ្រាប់ទាំងនេះហើយត្រូវបានការិយាល័យជំនាញនៃស្នងការដ្ឋាននគរបាលខេត្តតាកែវប្រគល់ឲ្យអង្គភាពកំចាត់មីនសុីម៉ាក់យកទៅកំទិចចោលរួចហើយ ។ ក្រៅពីចុះប្រមូលគ្រាប់ អាជ្ញាធរពាក់ព័ន្ធបានផ្តាំផ្ញើដល់ប្រជាពលរដ្ឋត្រូវមានការប្រុងប្រយ័ត្ននៅពេលដែលប្រទះឃើញគ្រាប់មិនទាន់ផ្ទុះនិងត្រូវរាយការណ៍មកសមត្ថកិច្ចមូលដ្ឋានជាបន្ទាន់ជៀសវាង នាំឲ្យមានគ្រោះថ្នាក់ដល់ពួកគាត់៕ តាកែវ
